अन्तरिक्ष प्रविधिमा आत्मनिर्भर बन्ने क्रममा भारतले आफ्नो स्वदेशी उपग्रह नेभिगेसन प्रणालीलाई अझ शक्तिशाली बनाउन नयाँ पुस्ताको उपग्रह सफलतापूर्वक कक्षमा प्रक्षेपण गरेको छ ।
भारतीय अन्तरिक्ष अनुसन्धान संगठन (इसरो) का अनुसार, श्रीहरिकोटामा रहेको सतीश धवन अन्तरिक्ष केन्द्रबाट यो उपग्रहको सफल प्रक्षेपण गरिएको हो । सामान्यतया, कुनै पनि ठाउँको सही भौगोलिक अवस्थिति र वास्तविक समय पत्ता लगाउने प्रविधि नेभिगेसन प्रणाली हो । आधुनिक युगमा नक्साङ्कन, यातायात, हवाई उडान, जलपोत सञ्चालन, आपत्कालीन उद्धार तथा सामरिक सुरक्षाका लागि यो प्रविधि अपरिहार्य मानिन्छ ।
यसअघि विश्वभर नै अमेरिकी जीपीएस प्रणालीमा मात्र निर्भर रहनुपर्ने बाध्यता रहे पनि, अब भारतले आफ्नै प्राविधिक क्षमता विकास गरी रक्षा तथा नागरिक दुवै क्षेत्रमा परनिर्भरता घटाएको छ । नयाँ प्रक्षेपण गरिएको एनभीएस–थ्रि उपग्रहमा भारतमै निर्मित अत्याधुनिक ’एटमिक क्लक’ जडान गरिएको छ, जसले अझै सटीक तथ्याङ्क प्रदान गर्नेछ ।
यसले भारतको भूभागसहित सीमा क्षेत्रबाट १५ सय किलोमिटरको दायरालाई समेट्नेछ । यस प्रणालीले आउँदा दिनमा विपद् व्यवस्थापन, मोबाइल प्रविधि र सर्वसाधारणको दैनिकीलाई अझ सहज बनाउने विश्वास गरिएको छ ।
